ភ្នំពេញ៖ ប្រធានគណបក្សប្រជាជនកម្ពុជា សម្ដេចតេជោ ហ៊ុន សែន បានប្រកាសឲ្យប្រជាជនបន្តចូលរួមប្រឆាំងនយោបាយជ្រុលនិយមរបស់ត្រកូលក្បត់ជាតិ ៣ជំនាន់ ដើម្បីការពារស្ថិរភាព សន្ដិភាពដែលកម្ពុជាមាននាពេលបច្ចុប្បន្ន។
បន្ថែមពីនេះសម្ដេចកីព្រមានគណបក្សនយោបាយកុំឲ្យពាក់ព័ន្ធនឹងនយោបាយរបស់ត្រកូលក្បត់ជាតិនេះឲ្យសោះ។
ថ្លែងក្នុងពេលដែលកម្ពុជាប្រារព្ធទិវាជ័យជម្នះថ្ងៃទី៧ មករា ខួបទី៤៤ ដែលប្រព្រឹត្តនៅកោះពេជ្រ ព្រឹកថ្ងៃទី៧ ខែមករា ឆ្នាំ២០២៣នេះ សម្ដេចតេជោ ហ៊ុន សែន បានថ្លែងថា៖ «ខ្ញុំសូមគូសបញ្ជាក់ជូនជនរួមជាតិថា យើងត្រូវកម្ចាត់នយោបាយជ្រុលនិយមរបស់ទណ្ឌិតក្បត់ជាតិ និងបក្សពួកដែលកំពុងគេចខ្លួនរស់នៅក្រៅប្រទេសឱ្យអស់ពីសង្គមជាតិយើង មិនទុកឱ្យវាបន្តបំពុលសង្គម បំផ្លាញដំណើររីកចម្រើន និងបង្កការបែកបាក់ជាតិ ដែលនឹងនាំទៅដល់គ្រោះមហន្តរាយជាថ្មីទៀតសម្រាប់ប្រជាជាតិយើង។ ជនណា ឬគណបក្សនយោបាយណាដែលបម្រើនយោបាយជ្រុលនិយមរបស់ទណ្ឌិតក្បត់ជាតិនោះ ត្រូវកែប្រែខ្លួនឱ្យបានទាន់ពេល បើពុំដូច្នោះទេនឹងត្រូវប្រឈមនឹងវិធានការច្បាប់ជាធរមាន»។
ថ្វីត្បិតតែសម្ដេចតេជោមិនបានចេញឈ្មោះត្រកូលជាតិនេះ តែមហាជនអាចដឹងបានហើយថា សម រង្ស៉ី ដែលជាកូនរបស់លោក សម សារី ដែលលោកសម សារី ត្រូវបានតុលាការក្នុងសម័យសង្គមរាស្ត្រនិយមកាត់ទោសពាក់ព័ន្ធនឹងអំពើក្បត់ជាតិក្រោយរកឃើញថាចង់ផ្ដួលរំលំរដ្ឋាភិបាលព្រះ នរោត្តម សីហនុ៕
